Maiatzaren 8an berri goibela heldu zitzaigun Caucako Vxu Beh Kiwe babesgune nasatik (Kolonbia), hango lankideek Luz Dary Vitonás Ramos hizkuntza-sustatzailearen heriotzaren berri eman zigutenean. Ahots mindu batek helarazi zigun berria, heriotzara ohituegi dagoen lurralde hartatik. Oraingoan gaixotasuna izan da, eta ez indarkeria, bizitza behar baino askoz arinago eten diona.

Elkarlan luzea du Garabide Elkarteak Caucako nasekin, eta hango lankide askok bisitatu gaituzte Euskal Herrian egindako Ikastaldi eta Aditu Ikastaroetan. Luz Dary 2022ko edizioan ezagutu genuen gutako gehienok. Geroztik, nasa yuwe hizkuntzaren aldeko borrokan jarraitu zuen, hango hizkuntza-sustatzaileen taldean, eta nasa erakundeetako emakume taldeak hizkuntzaren biziberritze-prozesuan inplikatzeko lanean ziharduen.

Zaila zaigu, oraindik ere, dagoeneko gure artean ez zaudela sinestea. Zure lurraldera egingo ditugun hurrengo bisitetan ikusiko dugu, benetan, nolako hutsunea utzi duzun. Bitartean, zure ingurukoek erein egin zaituzte honezkero, nasek esaten duzuen bezala, eta bizitzan egin zenuen lanetik fruitu berriak ernatuko dira, seguru. Besarkada estu bat senide, lagun eta Nasa Yuwe Hariko kideei, eta beste bat zuri. Çhxaçhxa çhxaçhxa!