Ikastolako ariketa batean, alabak Europan estatu elebakarrak zein diren bilatu behar zuen interneten. Esan eta egin. Besteak beste, honako hau aurkitu dugu:
- Europan 50 hizkuntza baino gehiago hitz egiten dira.
- Europa osoan bakarrik hiru estatu elebakar dago (Portugal, Albania eta Bulgaria). Beste guztiak eleaniztunak dira; hau da, hizkuntza bat baino gehiago hitz egiten da beren lurraldean.
- Espainian lau hizkuntza daude: Gaztelera, Euskara, Galiziera eta Katalana
Seigarren mailako Euskara eta Literatura liburu batetik ateratakoa da, antza. Ez pentsa, ez da horren berezia. Sarri entzun dugu hizkuntzak zerrendatzeko dauden zailtasunen berri.
Unesco Etxearen amaraun ikerketa taldeak Europako hizkuntzei buruzko lan bikain bat argitaratu zuen orain dela urte batzuk. Horri begiratuz gero:
- Europan hitz egiten diren hizkuntza guztien zerrenda ageri da bertan: 159 (hemen).
- Portugalen, portugesa ezezik mirandera ere hitz egiten da, garai bateko leoneraren aldaera bat, alegia.
- Albanian bi hizkuntza ageri dira: albaniera (albaniar azpi-familikoa) eta greziera (greziar azpi-familiakoa).
- Bulgarian ere bi: arumanera (erromantzea) eta bulgariera (eslaviarra)
- Estatu espainiarrean 7 ageri dira: aragoiera, aranera, asturiera, galiziera, gaztelania, katalana (erromantzeak) eta euskara (isolatua)
- Islandian islandiera (germanikoa) da hango hizkuntza bakarra.
Contested Languages (Hizkuntza ukatuak) estatuko hizkuntza nagusitik linguistikoki gehiegi bereizten ez diren hizkuntzak dira. Sarri ez dira ofizialak izaten, eta “dialekto” edo “patois” moduan sailkatu izan dira: asturiera, aragoiera, siziliera, napoliera, piemontera , bavariera… Bizitza publikotik at egon ohi dira, eta ez dute onarpen ofizialik. Edo alderantziz… onarpen ofizialik ez dutenez, bizitza publikotik at egon ohi dira.
Duela gutxi, Torinon, jardunaldi bat egin dute hizkuntza ukatuei buruz. Llengua i Dret aldizkariak horren kronika egin du bere blogean: hemen. Hizkuntza horientzat ikusgarritasun handiagoa aldarrikatu, eta horien aldeko indarrak batzeko beharra adierazi dute: aktibistek, adituek, akademikoek eta ikerlariek elkarrekin jarduteko beharra, alegia.